11 جون سے ملک بھر میں آندھی، گرد آلود ہواؤں، تیز بارش اور ژالہ باری کی پیش گوئی
اسلام آباد: پاکستان محکمہ موسمیات (پی ایم ڈی) نے 11 سے 13 جون کے دوران ملک کے مختلف علاقوں میں گرد آلود ہواؤں، آندھی، گرج چمک کے ساتھ بارش اور بعض مقامات پر ژالہ باری کی پیش گوئی کرتے ہوئے شہریوں کو احتیاط برتنے کی ہدایت کی ہے۔
محکمہ موسمیات کے مطابق ایک مغربی ہواؤں کا سلسلہ 11 جون کو پاکستان کے بالائی علاقوں میں داخل ہوگا اور 13 جون تک اس کے اثرات برقرار رہنے کا امکان ہے۔ بحیرہ عرب سے آنے والی مرطوب ہوائیں بھی شمالی اور وسطی علاقوں میں موسمی سرگرمیوں میں شدت پیدا کر سکتی ہیں۔
پنجاب کے مختلف شہروں، بشمول لاہور، راولپنڈی، مری، گجرات، گوجرانوالہ، سیالکوٹ، نارووال، شیخوپورہ، فیصل آباد، ساہیوال، اوکاڑہ، سرگودھا، بہاولپور، ملتان اور ڈیرہ غازی خان میں تیز ہواؤں اور گرج چمک کے ساتھ بارش متوقع ہے۔
خیبرپختونخوا کے متعدد اضلاع، جن میں سوات، چترال، دیر، مالاکنڈ، پشاور، مردان، کوہاٹ، بنوں اور ڈیرہ اسماعیل خان شامل ہیں، وہاں بھی بارش اور گرد آلود ہواؤں کا امکان ظاہر کیا گیا ہے۔
اسی طرح گلگت بلتستان، آزاد کشمیر اور شمال مشرقی بلوچستان کے بعض علاقوں میں بھی بارش، تیز ہوائیں اور چند مقامات پر ژالہ باری متوقع ہے، جبکہ سندھ کے بالائی اضلاع میں گرد آلود ہوائیں چلنے کا امکان ہے۔
پی ایم ڈی نے خبردار کیا ہے کہ تیز ہوائیں، ژالہ باری اور آسمانی بجلی کے باعث سولر پینلز، بجلی کے کھمبوں اور کمزور ڈھانچوں کو نقصان پہنچ سکتا ہے۔ اس کے علاوہ شدید بارشوں کے نتیجے میں بعض نشیبی علاقوں میں شہری سیلاب اور پہاڑی علاقوں میں لینڈ سلائیڈنگ کا خدشہ بھی موجود ہے۔
محکمہ موسمیات نے کسانوں، مسافروں اور سیاحوں کو احتیاطی تدابیر اختیار کرنے کی ہدایت کرتے ہوئے متعلقہ اداروں کو بھی الرٹ رہنے کی تاکید کی ہے۔
