یورپی ممالک کا سفر کرنے والے پاکستانیوں کے لیے 2026 میں نئے امیگریشن قوانین سے متعلق اہم پیش رفت
اسلام آباد: یورپی ممالک کا سفر کرنے کے خواہشمند پاکستانی شہریوں کے لیے اہم پیش رفت سامنے آئی ہے، کیونکہ جون 2026 سے یورپی یونین میں ہجرت اور سیاسی پناہ سے متعلق نئے قوانین کے نفاذ کا امکان ظاہر کیا جا رہا ہے۔
بیورو آف امیگریشن اینڈ اوورسیز ایمپلائمنٹ کے مطابق مجوزہ نظام کے تحت سرحدی مقامات پر جانچ پڑتال کے عمل کو مزید سخت اور مؤثر بنایا جائے گا، جبکہ سیاسی پناہ کی درخواستوں پر فیصلوں کا عمل بھی پہلے کے مقابلے میں تیز کیا جائے گا۔
نئے اقدامات کا مقصد امیگریشن کے معاملات کو بہتر انداز میں منظم کرنا اور غیر قانونی قیام سے متعلق مقدمات کو جلد نمٹانا ہے۔
رپورٹس کے مطابق یورپی یونین ان افراد کی واپسی کے عمل کو بھی مزید مؤثر بنانا چاہتی ہے جو رکن ممالک میں قانونی دستاویزات کے بغیر مقیم پائے جاتے ہیں۔ اس مقصد کے لیے محفوظ ممالک کی ایک مشترکہ فہرست اور واپسی کے نئے طریقہ کار پر بھی کام کیا جا رہا ہے۔
حکام نے عندیہ دیا ہے کہ امیگریشن قوانین کی خلاف ورزی کرنے والے افراد کو نئے نظام کے تحت تیز رفتار کارروائی اور ملک بدری کے عمل کا سامنا کرنا پڑ سکتا ہے۔
یہ مجوزہ تبدیلیاں یورپی یونین کے رکن ممالک میں امیگریشن کے نظام کو مضبوط بنانے اور سیاسی پناہ کے معاملات کو زیادہ مؤثر اور منظم بنانے کی وسیع حکمت عملی کا حصہ ہیں۔
