پاکستان میں گروسری اور کریانہ اسٹورز کے بند ہونے کے نئے اوقات کا اعلان
اسلام آباد:ایندھن کے تحفظ اور کفایت شعاری کے اقدامات کی نگرانی کرنے والی کمیٹی نے ملک بھر میں خوردہ دکانوں کے اوقات کار میں تبدیلی سمیت کئی موجودہ پالیسیوں میں 30 جون 2026 تک توسیع کی سفارش کر دی ہے۔
نائب وزیراعظم اور وزیر خارجہ سینیٹر محمد اسحاق ڈار کی زیر صدارت ہونے والے اجلاس میں مختلف وزارتوں اور ڈویژنوں کی جانب سے کفایت شعاری کے قواعد سے متعلق استثنیٰ کی درخواستوں کا جائزہ لیا گیا اور متعدد سفارشات کو حتمی شکل دی گئی۔
اجلاس میں فیصلہ کیا گیا کہ وزارت خارجہ کی قونصلر تصدیقی خدمات اور کراچی، لاہور، پشاور، کوئٹہ اور گجرات میں قائم اس کے رابطہ دفاتر عوامی سہولت کے پیش نظر جمعہ کے روز بھی کھلے رہیں گے۔
کمیٹی نے سفارش کی کہ موجودہ کفایت شعاری کا فریم ورک، جس کی مدت 13 جون 2026 کو ختم ہو رہی ہے، اسے 30 جون 2026 تک توسیع دی جائے۔
عوامی سہولت کو مدنظر رکھتے ہوئے یہ بھی تجویز دی گئی ہے کہ ملک بھر میں اسٹینڈ الون گروسری اور کریانہ اسٹورز کے بند ہونے کا وقت روزانہ رات 10 بجے تک بڑھا دیا جائے، جس کا اطلاق ہفتہ وار تعطیلات پر بھی ہوگا۔
اجلاس میں وزرائے پیٹرولیم، موسمیاتی تبدیلی، آئی ٹی و ٹیلی کام، خزانہ کے امور سے متعلق معاون خصوصی، کابینہ، تجارت، پیٹرولیم اور آئی ٹی ڈویژن کے سینئر وفاقی سیکریٹریز سمیت دیگر متعلقہ حکام نے شرکت کی۔
