واشنگٹن: امریکی صدر ڈونلڈ ٹرمپ نے ایک فون کال کے دوران لبنان میں اسرائیل کی فوجی کارروائیوں پر اسرائیلی وزیر اعظم بنجمن نیتن یاہو کو شدید تنقید کا نشانہ بنایا ہے۔ امریکی میڈیا کے مطابق یہ اہم پیشرفت ایران کی جانب سے لبنان میں اسرائیلی اقدامات کے خلاف احتجاجاً امریکہ کے ساتھ مذاکرات ختم کرنے کی دھمکی کے بعد سامنے آئی ہے۔
نیتن یاہو ‘پاگل’ قرار، بیروت حملے پر بریک
امریکی میڈیا رپورٹ ‘ایکسیو’ کے مطابق، اس فون کال کے دوران صدر ٹرمپ نے نیتن یاہو کو “پاگل” کہا اور ان پر ناشکری کا الزام بھی عائد کیا۔ اس کے ساتھ ہی ٹرمپ نے بیروت پر بڑے پیمانے پر حملہ کرنے کے اسرائیلی منصوبے پر بھی بریک لگا دی۔
صدر ٹرمپ نے اپنے سوشل میڈیا پلیٹ فارم ‘ٹروتھ سوشل’ پر ایک پوسٹ کے ذریعے اس گفتگو کی علانیہ تصدیق کی ہے۔
ڈونلڈ ٹرمپ کا سوشل میڈیا بیان: “میں نے آج بی بی نیتن یاہو کے ساتھ بات چیت کی، ان سے کہا کہ وہ بیروت، لبنان کے بڑے چھاپے میں نہ جائیں، انہوں نے اپنے دستوں کا رخ موڑ دیا۔ شکریہ بی بی! میں نے حزب اللہ کے لیڈروں کے نمائندوں کے ساتھ بھی بات چیت کی، اور انہوں نے اس بات پر اتفاق کیا کہ اسرائیل پر گولی چلانا بند کر دیں، اور اس کے فوجیوں کو اسرائیل کی طرح گولی مارنے سے روکنے پر اتفاق کیا گیا۔ جو رہتا ہے — امید ہے کہ یہ ابد تک رہے گا!”
بڑے پیمانے پر جانی نقصان اور عالمی تنہائی کا خطرہ
امریکی میڈیا کے مطابق، اس ٹیلیفونک گفتگو کے دوران صدر ٹرمپ نے اسرائیلی کارروائیوں کے نتیجے میں خطے میں ہونے والے بڑے پیمانے پر جانی نقصان پر شدید برہمی کا اظہار کیا، جبکہ اسرائیل کی جانب سے اہداف کو نشانہ بنانے کے طریقوں پر بھی کئی سوالات اٹھائے۔
رپورٹ کے مطابق گفتگو کے دوران درج ذیل اہم نکات سامنے آئے:
ٹرمپ نے انتہائی سخت لہجے میں واضح کیا کہ اس طرح کا طرز عمل اسرائیل کو بین الاقوامی سطح پر تنہا کر سکتا ہے۔
اس پوری گفتگو کے دوران دونوں رہنماؤں کے درمیان کئی جذباتی تبادلے بھی دیکھنے میں آئے۔
دوسری جانب، اسرائیلی وزیر اعظم نیتن یاہو نے بات چیت کے دوران نسبتاً محتاط انداز اپنایا اور صورتحال کو قابو میں رکھنے کی کوشش کی۔
لبنان میں جنگ بندی کے لیے امریکی رابطے
ذرائع کا کہنا ہے کہ خطے کی تیزی سے بدلتی ہوئی صورتحال کے پیشِ نظر امریکی قیادت لبنان میں ممکنہ جنگ بندی اور فوجی کارروائیوں کے حوالے سے مختلف سطحوں پر مسلسل رابطے کر رہی ہے۔ واضح رہے کہ صدر ٹرمپ پہلے ہی لبنان میں جاری ملٹری آپریشن کو روکنے کے حوالے سے ایک الگ اور واضح موقف اختیار کر چکے ہیں۔
