نئے سال 2026 کا آغاز کراچی کے شہریوں کے لیے خوشی کے بجائے خوف اور المیے کی علامت بن گیا، جہاں شہر کے مختلف علاقوں میں ہوائی فائرنگ کے واقعات کے نتیجے میں 25 سے زائد افراد زخمی ہو گئے۔
ریسکیو ذرائع اور اسپتالوں کے مطابق زخمی ہونے والوں میں خواتین، بچے اور بزرگ بھی شامل ہیں، جنہیں جناح پوسٹ گریجویٹ میڈیکل سینٹر، سول اسپتال اور عباسی شہید اسپتال منتقل کیا گیا۔
زخمی بچوں میں صفورا کے علاقے سے 8 سالہ فریحہ اور کورنگی ایریا مارکیٹ میں 11 سالہ ماہ جبین شامل ہیں، جبکہ محمود آباد کی 18 سالہ وجیہہ، قیوم آباد ڈی ایریا کی 40 سالہ علینہ اور گلزار ہجری اسکیم 33 کی 55 سالہ شمیم عمر بھی زخمیوں میں شامل ہیں۔
دیگر متاثرین میں لائنز ایریا کی 53 سالہ معراج بانو، اعظم بستی کے قریب 24 سالہ عجوہ، گلستان جوہر بلاک 2 کے 35 سالہ دریس شفیق، چنیسر گوٹھ کے مختیار، گولیمار اور سبزی منڈی کے علاقوں سے 33 سالہ نبیل، جبکہ کورنگی نمبر 5 کا 20 سالہ احمد بھی شامل ہے۔
پاک کالونی، اعظم بستی، فائیو اسٹار چورنگی، جوہر موڑ، لیاقت آباد، لی مارکیٹ، کالا پل، موسیٰ کالونی، لیاری، کورنگی، ماڑی پور، منظور کالونی اور کشمیر روڈ سمیت کئی علاقوں سے بھی ہوائی فائرنگ کے باعث زخمی ہونے کی اطلاعات موصول ہوئیں۔
حکام نے شہریوں کو سختی سے متنبہ کیا ہے کہ ہوائی فائرنگ ایک خطرناک اور غیر قانونی عمل ہے جو ہر سال معصوم جانوں کو نشانہ بناتا ہے۔ پولیس کی جانب سے نئے سال کے موقع پر سخت وارننگ دی گئی تھی اور سیکیورٹی کے لیے ڈرون کے ذریعے نگرانی سمیت خصوصی اقدامات بھی کیے گئے تھے، اس کے باوجود افسوسناک واقعات پیش آئے۔
