کراچی:
پاکستان بھر میں انٹرنیٹ صارفین کو سست رفتار اور کنیکٹیویٹی کے مسائل کا سامنا ہے، جس کی وجہ ایک بڑے اپ اسٹریم انٹرنیٹ فراہم کنندہ کو پیش آنے والی تکنیکی خرابی بتائی جا رہی ہے۔
ذرائع کے مطابق اس تکنیکی مسئلے کے باعث ملک کے مختلف حصوں میں انٹرنیٹ کی رفتار نمایاں طور پر کم ہو گئی ہے، جس سے صارفین کی آن لائن سرگرمیاں، دفتری امور اور ڈیجیٹل سروسز متاثر ہو رہی ہیں۔
معروف انٹرنیٹ سروس فراہم کرنے والی کمپنی نیاٹیل نے اپنے آفیشل سوشل میڈیا پلیٹ فارمز پر جاری بیان میں بتایا کہ انٹرنیٹ سروس میں سست روی اس کے دو اپ اسٹریم فراہم کنندگان میں سے ایک کے ساتھ پیش آنے والے عارضی تکنیکی مسئلے کے باعث ہے۔
بیان کے مطابق اس خرابی کی وجہ سے مختلف شہروں میں انٹرنیٹ ٹریفک متاثر ہوئی اور صارفین کو کنیکٹیویٹی کے مسائل کا سامنا کرنا پڑا۔
نیاٹیل نے صارفین کو یقین دہانی کرائی ہے کہ اس کی تکنیکی ٹیمیں متاثرہ اپ اسٹریم فراہم کنندہ کے ساتھ مسلسل رابطے میں ہیں اور مسئلے کو جلد از جلد حل کرنے کے لیے کام جاری ہے۔
تاہم، کمپنی کی جانب سے سروس کی مکمل بحالی کے لیے کوئی حتمی ٹائم لائن جاری نہیں کی گئی۔ صارفین کو مشورہ دیا گیا ہے کہ وہ مزید معلومات اور اپ ڈیٹس کے لیے سرکاری اعلانات پر نظر رکھیں۔
