اسلام آباد:
پاکستان نے بنگلہ دیش کی قومی فضائی کمپنی بیمان بنگلہ دیش ایئرلائنز کو ڈھاکہ اور کراچی کے درمیان براہ راست پروازیں شروع کرنے کی باضابطہ اجازت دے دی ہے، جس سے دونوں ممالک کے درمیان فضائی رابطوں میں ایک نیا باب کھل گیا ہے۔
پاکستان سول ایوی ایشن اتھارٹی (سی اے اے) کے مطابق بنگلہ دیشی ایئرلائن کو تین ماہ کے لیے پروازیں چلانے کا لائسنس جاری کیا گیا ہے، جو 30 مارچ 2026 تک مؤثر رہے گا۔ اس مدت کے دوران بیمان بنگلہ دیش کو منظور شدہ روٹ پر پاکستان کی فضائی حدود استعمال کرنے کی اجازت حاصل ہوگی۔
حکام کا کہنا ہے کہ اس فیصلے سے پاکستان اور بنگلہ دیش کے درمیان مسافروں کے لیے سفری سہولیات میں اضافہ ہوگا اور فضائی روابط مزید مضبوط ہوں گے۔
اس سے قبل وزیر دفاع خواجہ آصف نے تصدیق کی تھی کہ برطانیہ میں قائم ایئرلائن نورس اٹلانٹک کو بھی پاکستان کے لیے براہ راست پروازیں چلانے کی منظوری دی گئی ہے۔ یہ ایئرلائن لندن، مانچسٹر اور برمنگھم سے اسلام آباد کے لیے پروازیں شروع کرے گی، جس سے بین الاقوامی فضائی آمدورفت میں نمایاں اضافہ متوقع ہے۔
واضح رہے کہ نومبر 2025 میں پاکستان انٹرنیشنل ایئرلائنز (پی آئی اے) اور بیمان بنگلہ دیش ایئرلائنز کے درمیان ایک اہم معاہدہ بھی طے پایا تھا، جس کا مقصد دونوں ممالک کے درمیان فضائی کارگو آپریشنز کو وسعت دینا تھا۔
اس معاہدے کے تحت، سعودی عرب کے شہر جدہ، مدینہ اور ریاض کو ٹرانزٹ ہب کے طور پر استعمال کیا جائے گا، تاکہ ٹیکسٹائل، دواسازی اور زرعی مصنوعات سمیت قیمتی سامان کی ترسیل کو مزید مؤثر اور آسان بنایا جا سکے۔
