پاکستان بھر میں نئے سال 2026 کا آغاز جوش و خروش، رنگا رنگ تقریبات اور شاندار آتش بازی کے ساتھ کیا گیا۔ کراچی، لاہور، اسلام آباد سمیت بڑے شہروں میں آدھی رات کو آسمان روشنیوں سے جگمگا اٹھا اور شہریوں نے نئے سال کا پرتپاک استقبال کیا۔
کراچی میں گورنر ہاؤس میں خصوصی تقریب منعقد کی گئی جہاں شاندار آتش بازی نے نئے سال کی آمد کو یادگار بنا دیا۔ بڑی تعداد میں شہریوں نے تقریب میں شرکت کی اور نئے سال کی خوشیاں منائیں۔
دوسری جانب کراچی کے باغِ ابنِ قاسم میں بھی بھرپور تقریبات ہوئیں، جہاں میئر کراچی مرتضیٰ وہاب نے شرکت کی۔ میوزیکل نائٹ کے دوران مختلف علاقائی زبانوں میں لوک گیت پیش کیے گئے، جبکہ آدھی رات کو آتش بازی نے جشن کو عروج پر پہنچا دیا۔
وفاقی دارالحکومت اسلام آباد میں بھی نئے سال کی تقریبات بھرپور انداز میں منائی گئیں۔ ایکسپریس وے پر واقع ایمریٹس ڈاؤن ٹاؤن کی عمارت میں آتش بازی کا شاندار مظاہرہ کیا گیا جس نے شہر کی فضا کو رنگین بنا دیا۔
سرد موسم اور وقفے وقفے سے بارش کے باوجود شہریوں کا جوش کم نہ ہوا۔ گرم ملبوسات میں ملبوس خواتین، بچے اور نوجوان بڑی تعداد میں سڑکوں پر موجود رہے، جبکہ موٹر سائیکل سوار نوجوان ساون گارڈن گیٹ کے قریب جمع ہو کر جشن مناتے رہے۔
لاہور میں بھی نئے سال کی خوشی میں لبرٹی چوک پر شاندار آتش بازی کا اہتمام کیا گیا۔ پنجاب حکومت کی جانب سے کیے گئے اس انتظام میں شہریوں کی بڑی تعداد نے شرکت کی۔ تقریبات کے دوران سیکیورٹی اور ٹریفک کے مؤثر انتظامات کے لیے پولیس اور ٹریفک وارڈنز کی بھاری نفری تعینات رہی۔
