اسلام آباد – امریکی کانگریس کا ایک وفد 10 سے 15 اپریل تک پاکستان کا اہم دورہ کرے گا۔
دورے کے دوران وفد وزیراعظم شہباز شریف، وزیر خارجہ اسحاق ڈار اور پاکستان کی اعلیٰ سیاسی و عسکری قیادت سے ملاقاتیں کرے گا۔
اطلاعات کے مطابق کانگریس مین جنرل جیک برگمین اور ٹام سوزی وفد کی قیادت کریں گے۔ ٹیم وزیر اعظم شہباز شریف، وزیر خارجہ اسحاق ڈار اور مختلف سیاسی جماعتوں کے رہنماؤں سے ملاقاتیں کرے گی۔
وفد آزاد جموں و کشمیر کا بھی دورہ کرے گا جہاں انہیں بھارت کے زیر قبضہ کشمیر کی تازہ ترین صورتحال اور لائن آف کنٹرول (ایل او سی) کے ساتھ سیکیورٹی کی صورتحال پر بریفنگ دی جائے گی۔
امریکی وفد کرتار پور راہداری کا دورہ کرے گا اور بابا گرو نانک کے مزار پر حاضری دے گا۔
دورے کا مقصد پاکستان اور امریکا کے درمیان دوطرفہ تعلقات کو مضبوط بنانا ہے۔ ایجنڈے کے اہم آئٹمز میں معیشت، تجارت، دفاع اور فوجی تعاون اور تعلیم شامل ہوں گے۔
