کراچی – پاکستان کے محکمہ موسمیات نے اسلام آباد اور ملک کے دیگر مختلف علاقوں میں گرج چمک کے ساتھ بارش کی پیش گوئی کی ہے۔
محکمہ موسمیات نے کہا کہ آج 26 مئی کو ملک کے بیشتر حصوں میں موسم گرم اور خشک رہنے کی توقع ہے۔
تاہم، شام اور رات میں، شمالی/جنوب مشرقی بلوچستان، کشمیر، خیبرپختونخوا، اسلام آباد، خطہ پوٹھوہار اور شمال مشرقی پنجاب میں گرج چمک کے ساتھ بارش کا امکان ہے۔
اسلام آباد اور گردونواح میں رات گئے گرج چمک کے ساتھ بارش کا امکان ہے جب کہ مری، گلیات، راولپنڈی، اٹک، چکوال، خوشاب، جہلم، حافظ آباد، گوجرانوالہ، منڈی بہاؤالدین، سرگودھا، میانوالی، گجرات، سیالکوٹ، نارووال، لاہور، اوکاڑہ اور شیخوپورہ میں بھی بارش کا امکان ہے۔
خیبرپختونخوا میں پشاور، چارسدہ، نوشہرہ، صوابی، دیر، چترال، سوات، وزیرستان، بنوں، کرم، کرک، کوہاٹ، لکی مروت، مالاکنڈ، شانگلہ، کوہستان، بٹگرام، مانسہرہ اور ایبٹ آباد میں گرج چمک کے ساتھ بارش کا امکان ہے۔
کوئٹہ، ژوب، موسیٰ خیل، سبی، بولان، کوہلو، بارکھان، خضدار، آواران، لورالائی اور لسبیلہ میں بھی بارش کا امکان ہے جب کہ سندھ کے بیشتر اضلاع میں موسم شدید گرم اور خشک رہے گا۔
آزاد کشمیر اور گلگت بلتستان میں تیز ہواؤں اور گرج چمک کے ساتھ بارش کا امکان ہے، ملک کے بعض علاقوں میں موسلادھار بارش اور ژالہ باری کا امکان ہے۔
