راولپنڈی – بنگلہ دیش کی مسلح افواج کے پرنسپل سٹاف آفیسر (PSO) لیفٹیننٹ جنرل قمر الحسن ایک وفد کے ساتھ پاکستان کا دورہ کر رہے ہیں، اس دوران انہوں نے اعلیٰ عسکری قیادت سے ملاقاتیں کیں۔
انٹر سروسز پبلک ریلیشنز (آئی ایس پی آر) کے مطابق بنگلہ دیش کی مسلح افواج کے پی ایس او نے آرمی چیف جنرل سید عاصم منیر سے ملاقات کی جس میں خطے کی ابھرتی ہوئی سیکیورٹی صورتحال پر تبادلہ خیال کیا گیا۔
آرمی چیف نے جنوبی ایشیا اور وسیع خطے میں امن و استحکام کے فروغ کے لیے مشترکہ کوششوں کی اہمیت کا اعادہ کیا۔ انہوں نے کہا کہ دونوں ممالک باہمی تعاون اور دفاعی اقدامات کے ذریعے علاقائی سلامتی میں اپنا کردار ادا کرتے رہیں گے۔
آئی ایس پی آر نے مزید بتایا کہ دونوں فریقین نے مضبوط دوطرفہ دفاعی تعلقات کی اہمیت پر زور دیا۔
ملاقات کے دوران دونوں ممالک نے پائیدار شراکت داری کو بڑھانے پر اتفاق کیا اور لیفٹیننٹ جنرل قمر الحسن نے دہشت گردی کے خلاف جنگ میں ان کی بے پناہ قربانیوں کو تسلیم کرتے ہوئے پاک فوج کی غیر معمولی پیشہ ورانہ مہارت کی تعریف کی۔
قبل ازیں لیفٹیننٹ جنرل قمر الحسن نے چیئرمین جوائنٹ چیفس آف سٹاف کمیٹی جنرل ساحر شمشاد مرزا سے بھی ملاقات کی جس میں دوطرفہ دفاعی تعاون اور سٹریٹجک امور پر تبادلہ خیال کیا گیا۔
آئی ایس پی آر نے بتایا کہ بات چیت میں دونوں ممالک کے درمیان دفاعی تعاون بڑھانے پر توجہ مرکوز کی گئی، دونوں فریقین نے فوجی تعلقات کو مضبوط بنانے کی اہمیت پر زور دیا۔
دونوں فریقوں نے اس شراکت داری کو کسی بھی بیرونی رکاوٹ سے بچانے اور علاقائی امن، سلامتی اور استحکام کو فروغ دینے کے لیے تعاون جاری رکھنے کی ضرورت پر اتفاق کیا۔
جنرل ساحر شمشاد مرزا نے کہا کہ دونوں ممالک محفوظ اور خوشحال مستقبل کے لیے مشترکہ وژن رکھتے ہیں جو مضبوط دفاعی تعاون پر مبنی ہے۔
