اسلام آباد:
مسابقتی کمیشن آف پاکستان (CCP) نے پیپسی کو کے مشہور انرجی ڈرنک ’اسٹنگ‘ کی نقل کرنے پر میزان بیوریجز (پرائیویٹ) لمیٹڈ پر 15 کروڑ روپے جرمانہ عائد کر دیا ہے۔ کمیشن کے مطابق میزان کا انرجی ڈرنک ’طوفان‘ ڈیزائن، رنگ، بوتل کی ساخت اور مجموعی برانڈنگ میں اس قدر مشابہ تھا کہ صارفین کے لیے دونوں مصنوعات میں فرق کرنا مشکل ہو جاتا تھا۔
سی سی پی کی تحقیقات میں یہ بات سامنے آئی کہ ’طوفان‘ نے اسٹنگ کے نمایاں سرخ رنگ، ترچھے سفید حروف، جارحانہ گرافکس اور بوتل کی پیشکش کو تقریباً مکمل طور پر نقل کیا، جس سے فروخت کے مقامات پر صارفین کے دھوکہ کھانے کا واضح خطرہ موجود تھا۔
کمیشن نے اس عمل کو “طفیلی نقل” قرار دیتے ہوئے مسابقتی ایکٹ 2010 کے سیکشن 10 کے تحت دھوکہ دہی پر مبنی مارکیٹنگ کی سنگین خلاف ورزی قرار دیا۔
یہ تنازعہ 2018 میں شروع ہوا تھا، جب پیپسی کو نے الزام عائد کیا کہ میزان نے اسٹنگ کی کامیابی سے فائدہ اٹھانے کے لیے ’طوفان‘ کو اسی طرز پر متعارف کروایا۔ معاملہ برسوں تک قانونی کارروائی کی نذر رہا، جس دوران میزان نے 2018 اور 2021 میں لاہور ہائی کورٹ سے حکم امتناعی حاصل کر کے تحقیقات میں تاخیر کی۔
گزشتہ سال لاہور ہائی کورٹ نے میزان کی درخواست مسترد کرتے ہوئے واضح کیا کہ مسابقتی کمیشن کو اس کیس کی سماعت کا مکمل اختیار حاصل ہے۔ عدالت نے یہ بھی قرار دیا کہ ٹریڈ مارک کی ملکیت مسابقتی قانون کی خلاف ورزی سے تحفظ فراہم نہیں کرتی، خاص طور پر جب صارفین کو گمراہ کیے جانے کے شواہد موجود ہوں۔
سی سی پی نے اپنے فیصلے میں زور دیا کہ کسی بھی پروڈکٹ کی قانونی جانچ صرف معمولی فرق پر نہیں بلکہ مجموعی تجارتی تاثر پر کی جاتی ہے، اور اس کیس میں ’طوفان‘ واضح طور پر صارفین کو کنفیوژن میں مبتلا کرنے کا باعث بن رہا تھا۔
