کراچی – پاکستان کے محکمہ موسمیات (پی ایم ڈی) نے پیر (5 مئی) کو کراچی میں گرج چمک کے ساتھ بارش کی پیش گوئی کی ہے۔
اس نے کہا کہ ایک مغربی موسمی نظام ملک کے بالائی اور وسطی حصوں کو متاثر کر رہا ہے، اور اس کا اثر اب جنوبی علاقوں تک بھی پھیل رہا ہے۔
جامشورو، ٹنڈو محمد خان، بدین، ٹھٹھہ، شہدادکوٹ، حیدرآباد، مٹیاری، ٹنڈو الہ یار، میرپورخاص، سانگھڑ اور شہید بینظیر آباد کے اضلاع میں آج (اتوار) گرج چمک کے ساتھ ہلکی بارش کا امکان ہے۔
گھوٹکی، سکھر، خیرپور، سانگھڑ، میرپورخاص اور ٹنڈو محمد خان میں بھی چند مقامات پر گرج چمک کے ساتھ ہلکی بارش کی پیشگوئی کی گئی ہے۔
عمرکوٹ، تھرپارکر، بدین، حیدرآباد، مٹیاری اور جامشورو کے اضلاع میں کل سے بارش کا امکان ہے۔ کراچی اور صوبے کے بیشتر علاقوں میں آج اور کل بھی تیز ہوائیں چلنے کا امکان ہے۔
محکمہ موسمیات نے خبردار کیا ہے کہ گرج چمک، ژالہ باری اور آسمانی بجلی کمزور ڈھانچے کو نقصان پہنچا سکتی ہے۔
