اسلام آباد:
پاکستان میں کھاد کی فروخت نے ایک نیا تاریخی سنگ میل عبور کر لیا ہے۔ نیشنل فرٹیلائزر ڈیولپمنٹ سنٹر (NFDC) کی تازہ رپورٹ کے مطابق دسمبر 2025 میں یوریا کی فروخت 1.356 ملین ٹن تک پہنچ گئی، جو ملکی تاریخ کی سب سے زیادہ ماہانہ فروخت ہے۔
اعداد و شمار کے مطابق یوریا کی فروخت میں سالانہ بنیاد پر 37 فیصد جبکہ ماہ بہ ماہ 65 فیصد نمایاں اضافہ ریکارڈ کیا گیا۔ اس کے برعکس نومبر 2025 میں یوریا کی فروخت میں 4 فیصد کمی دیکھی گئی تھی۔
رپورٹ میں بتایا گیا ہے کہ دسمبر 2025 کے دوران ڈی اے پی (DAP) کھاد کی فروخت 800,000 ٹن رہی، جس میں ماہانہ بنیاد پر 67 فیصد اور سالانہ بنیاد پر 42 فیصد اضافہ ہوا۔
کھاد کی فروخت میں اضافے کی ایک بڑی وجہ کھاد ساز کمپنیوں کی جانب سے دی جانے والی رعایتیں بھی رہیں۔ اینگرو فرٹیلائزرز نے دسمبر میں یوریا پر 400 روپے فی بیگ تک رعایت برقرار رکھی، جبکہ فوجی فرٹیلائزر کمپنی (FFC) نے 150 سے 200 روپے فی بیگ تک رعایت فراہم کی۔
رپورٹ کے مطابق دسمبر 2025 کے اختتام تک ملک میں یوریا کا مجموعی دستیاب اسٹاک کم ہو کر 315,000 ٹن رہ گیا، جبکہ ڈی اے پی کا اختتامی ذخیرہ 219,000 ٹن ریکارڈ کیا گیا۔
ماہرین کے مطابق ربیع کے سیزن میں کاشت کاری میں تیزی، بڑھتی ہوئی زرعی سرگرمیوں اور کسانوں کی جانب سے پیشگی خریداری نے کھاد کی مانگ میں غیر معمولی اضافہ کیا ہے، جس کے نتیجے میں فروخت تاریخی سطح تک پہنچ گئی۔
