ورجینیا:
پاکستان فضائیہ کے سابق سربراہ، ایئر چیف مارشل (مرحوم) نور خان کی صاحبزادی اور ممتاز پاکستانی نژاد امریکی معالج ڈاکٹر فائقہ نور خان امریکہ میں پیش آنے والے ایک افسوسناک سڑک حادثے میں انتقال کر گئیں۔
رپورٹس کے مطابق 75 سالہ ڈاکٹر فائقہ نور خان، جو اطفال کی ایمرجنسی میڈیسن کی پروفیسر تھیں، ورجینیا کے علاقے ڈینویڈی کاؤنٹی میں ہفتے کے اختتام پر پیش آنے والے حادثے کا شکار ہوئیں۔ ان کی گاڑی سڑک پر موجود رکاوٹ سے ٹکرا گئی، جس کے بعد گاڑی میں آگ بھڑک اٹھی اور وہ موقع پر ہی جاں بحق ہو گئیں۔
ڈاکٹر فائقہ نور خان کا طبی شعبے میں ایک شاندار اور قابلِ فخر کیریئر رہا۔ انہوں نے 1993 میں کنگز ڈوٹر ہسپتال میں بطور معالج خدمات کا آغاز کیا، بعد ازاں کئی برس تک ایمرجنسی ڈیپارٹمنٹ کی میڈیکل ڈائریکٹر کے طور پر فرائض انجام دیتی رہیں۔
وہ بچوں اور ان کے خاندانوں کی نگہداشت کے ساتھ ساتھ آئندہ نسل کے ڈاکٹروں کی تربیت میں بھی غیر معمولی دلچسپی رکھتی تھیں۔ ان کی پیشہ ورانہ خدمات اور انسان دوستی نے طبی برادری پر گہرے اور دیرپا اثرات چھوڑے۔
کنگز ڈوٹر ہسپتال کی انتظامیہ نے ڈاکٹر فائقہ نور خان کے انتقال پر گہرے دکھ اور افسوس کا اظہار کرتے ہوئے ان کی طویل اور قابلِ قدر خدمات کو خراجِ تحسین پیش کیا ہے۔
اسی طرح کنگ ایڈورڈ میڈیکل یونیورسٹی لاہور، جہاں سے انہوں نے 1973 میں گریجویشن مکمل کی تھی، نے بھی تعزیتی پیغام جاری کیا اور انہیں ایک غیر معمولی طالبہ اور ادارے کی قابلِ فخر سابق طالبہ قرار دیا۔
ان کا اچانک انتقال خاندان، دوستوں، شاگردوں اور ساتھیوں کے لیے ایک ناقابلِ تلافی نقصان ہے۔ ڈاکٹر فائقہ نور خان کو ان کی پیشہ ورانہ دیانت، خدمتِ خلق اور مثبت اثرات کے باعث ہمیشہ یاد رکھا جائے گا۔
