غزہ: فلسطینی مزاحمتی تنظیم حماس نے اپنے عسکری ونگ القسام بریگیڈز کے ترجمان ابو عبیدہ کی شہادت کی باضابطہ تصدیق کر دی ہے۔
القسام بریگیڈز کے نئے ترجمان کی جانب سے جاری کیے گئے ایک ویڈیو بیان میں بتایا گیا کہ ابو عبیدہ سمیت تنظیم کے کئی اہم کمانڈر شہید ہو چکے ہیں۔ بیان میں یہ بھی واضح کیا گیا کہ ابو عبیدہ کا اصل نام حذیفہ الکہلوت تھا۔
نئے ترجمان کے مطابق، القسام بریگیڈز کی قیادت میں تبدیلیاں اس وقت سامنے آئیں جب سابق سربراہ محمد دیف کی شہادت کے بعد محمد السنوار (یحییٰ سنوار کے بھائی) نے تنظیم کی سربراہی سنبھالی۔
بیان میں مزید بتایا گیا کہ حذیفہ الکہلوت القسام بریگیڈز کے میڈیا ڈویژن “العلم العسکری” کے سربراہ بھی تھے اور انہوں نے دو دہائیوں سے زائد عرصے تک ترجمان کی حیثیت سے خدمات انجام دیں، اس دوران تنظیم کے میڈیا نظام کو جدید خطوط پر استوار کیا گیا۔
اہم اعلان میں یہ بھی کہا گیا کہ “ابو عبیدہ” کا لقب اب نئے ترجمان کو منتقل کر دیا گیا ہے، اور آئندہ سرکاری بیانات اسی نام سے جاری کیے جائیں گے۔ حماس کے مطابق، یہ لقب تنظیمی تسلسل کی علامت کے طور پر برقرار رکھا گیا ہے۔
واضح رہے کہ اسرائیلی حکام نے رواں برس اگست میں ابو عبیدہ کو نشانہ بنانے کا دعویٰ کیا تھا، تاہم اس وقت اس حوالے سے باضابطہ تصدیق سامنے نہیں آئی تھی۔
